ಜೀ ಕನ್ನಡದಲ್ಲಿ ಪ್ರಾರಂಭದಿಂದಲೇ ಅಪಾರ ನಿರೀಕ್ಷೆ ಹುಟ್ಟಿಸಿದ, ಹೆಣ್ಣುಮಕ್ಕಳು ಅಡುಗೆಮನೆಗೆ ಸೀಮಿತವಾಗಿಲ್ಲ, ಅವರು ಸಮಾಜದಲ್ಲಿ ಧೈರ್ಯವಾಗಿ ತಮಗೆ ಬೇಕಾದ ಏನನ್ನಾದರೂ ಸಾಧಿಸಬಹುದು ಎನ್ನುವುದನ್ನು ಎತ್ತಿ ತೋರಿಸಿದ ಪಾತ್ರ “ಸತ್ಯ” ಧಾರಾವಾಹಿಯ ಪಾತ್ರ. ಇಂದಿನ ಸಮಾಜದಲ್ಲಿ ಹೆಣ್ಣುಮಕ್ಕಳಿಗೆ ಮಾರ್ಗದರ್ಶಿಯಾದ ಪಾತ್ರ ಇದು. ಈಗ ಯಶಸ್ವಿಯಾಗಿ ನೂರು ಕಂತುಗಳನ್ನು ಪೂರೈಸಿದೆ. ಜನರ ಮನಸ್ಸಿನಲ್ಲಿ ಅಚ್ಚಳಿಯದ ಛಾಪು ಮೂಡಿಸಿದ ಪಾತ್ರ ಇದಾಗಿದೆ.
ಸತ್ಯ ಧಾರಾವಾಹಿಯ ಎಲ್ಲ ಪಾತ್ರಗಳೂ ವೀಕ್ಷಕರ ಮೆಚ್ಚುಗೆ ಪಡೆದಿದೆ. ಸಿನಿಮಾ ರೀತಿಯಲ್ಲಿ ಪ್ರೋಮೋಗಳನ್ನು ಬಿಡುಗಡೆ ಮಾಡಿದ ಸತ್ಯ ಧಾರಾವಾಹಿ ಸಿನಿಮಾದಂತೆಯೇ ಒಂದು ಕಲ್ಟ್ ಸೃಷ್ಟಿಸಿದೆ. ರಾತ್ರಿ 9 ಗಂಟೆಗೆ ಗಂಡಸರು ಸುದ್ದಿ ನೋಡಲು ಬಯಸುತ್ತಾರೆ. ಆದರೆ ಅದನ್ನು ಮೀರಿ ಎಲ್ಲರೂ “ಸತ್ಯ”ಧಾರಾವಾಹಿ ವೀಕ್ಷಿಸುತ್ತಿದ್ದಾರೆ. ಬರೀ ಮಹಿಳಾ ವೀಕ್ಷಕರೇ ಅಲ್ಲದೆ ಪುರುಷರೂ ಇಷ್ಟಪಟ್ಟು ನೋಡುತ್ತಿರುವ ಧಾರಾವಾಹಿ “ಸತ್ಯ”. ಜೀ ಕನ್ನಡದ ಬ್ರಾಂಡ್ ಧ್ಯೇಯ “ಬಯಸಿದ ಬಾಗಿಲು ತೆಗೆಯೋಣ”ದಂತೆ ಈ ಧಾರಾವಾಹಿ ಮಹಿಳಾ ಸಬಲೀಕರಣದ ಬಾಗಿಲುಗಳನ್ನು ತೆರೆದಿದೆ. ಸತ್ಯಳ ಟಾಮ್ ಬಾಯ್ ಪಾತ್ರ, ಆಕೆಯ ದಿಟ್ಟತನ ಎಲ್ಲರನ್ನೂ ಗೆದ್ದಿದೆ.
ಈ ಧಾರಾವಾಹಿಯ ಯಶಸ್ವಿ ನೂರನೇ ಕಂತಿನ ಕುರಿತು ಜೀ ಕನ್ನಡ ಬ್ಯುಸಿನೆಸ್ ಹೆಡ್ ರಾಘವೇಂದ್ರ ಹುಣಸೂರು, “ಜೀ ಕನ್ನಡದ ಎಲ್ಲ ಫಿಕ್ಷನ್ ಹಾಗೂ ನಾನ್-ಫಿಕ್ಷನ್ ಕಾರ್ಯಕ್ರಮಗಳನ್ನು ವೀಕ್ಷಕರು ಬಹಳ ಪ್ರೀತಿಯಿಂದ ಸ್ವಾಗತಿಸಿದ್ದಾರೆ. ಇದೀಗ ಮಹಿಳೆಯರಿಗೆ ಪ್ರೇರಕಶಕ್ತಿಯಾಗಿರುವ “ಸತ್ಯ” ಧಾರಾವಾಹಿ ನೂರು ಕಂತಿನ ಮೈಲಿಗಲ್ಲು ಮುಟ್ಟಿರುವುದು ಅವರ ಅಭೂತಪೂರ್ವ ಪ್ರೀತಿಗೆ ದ್ಯೋತಕವಾಗಿದೆ. ಜೀ ಕನ್ನಡ ವೀಕ್ಷಕರನ್ನು ರಂಜಿಸುವ ಮತ್ತಷ್ಟು ವಿನೂತನ ಕಾರ್ಯಕ್ರಮಗಳನ್ನು ನಾವು ನೀಡಲು ಇದು ಪ್ರೇರಣೆ ನೀಡಿದೆ” ಎಂದರು.
ಈ ಧಾರಾವಾಹಿಯನ್ನು ಪ್ರಖ್ಯಾತ ನಿರ್ಮಾಣ ಸಂಸ್ಥೆ ಆರ್.ಆರ್.ಆರ್. ಕ್ರಿಯೇಷನ್ಸ್ ನಿರ್ಮಾಣ ಮಾಡಿದೆ. ನಿರ್ದೇಶನ ಸ್ವಪ್ನಾ ಕೃಷ್ಣ ಅವರದು. ಗೌತಮಿ ಜಾದವ್, ಸಾಗರ್, ಹಿರಿಯ ನಟ ಶ್ರೀನಿವಾಸಮೂರ್ತಿ, ಅಭಿಜಿತ್ , ತ್ರಿವೇಣಿ ನಟಿಸಿದ್ದಾರೆ.